വൈറസ്

പ്രകൃതിയുടെ സാമൂഹ്യക്രമത്തില്‍ ,അധഃകൃതൻ 

പരിണാമത്തിന്റെ കാനേഷുമാരിയില്‍ , ആദിമഗോത്രം 

മാനവ ചരിത്രത്തിന്‍റെ  ഒഡീസിയില്‍, ട്രോജന്‍ കുതിര

പടക്കളത്തില്‍ ഇറങ്ങുന്നതുവരെ ,

ജാംബവവാക്യം കേള്‍ക്കാത്ത ഹനുമാന്‍

മനുഷ്യനെന്ന ഗോലിയാത്തിനെതിരെ

 പ്രകൃതിയുടെ ദാവീദ്

മനുഷ്യനോടുള്ള പ്രകൃതിയുടെ

                 ചീട്ടുകളിയില്‍, തുറുപ്പ് ചീട്ട്

                 വര്‍ഗ്ഗ സമരത്തില്‍ , മാവോയിസ്റ്റ് 

                ലോകമഹായുദ്ധത്തില്‍, അണുബോംബ്‌  

ഒരു പക്ഷേ,  

മനുഷ്യരാശിയുടെ അന്തിക്രിസ്തു 

പന്തം

ചിന്തകള്‍ക്ക് തീ പിടിക്കുമ്പോള്‍

ഞാനൊരു പന്തമാകുന്നു.

കൂടുതല്‍ ചൂടും

കുറച്ചു മാത്രം വെളിച്ചവും

കുറെയേറെ പുകപടലങ്ങളു-

മുരുവാക്കുന്നൊരു കുറ്റിച്ചൂട്ട് .

അവനവന്‍കടമ്പയെ മറികട-

ന്നൊരു കാട്ടുതീയാളിപ്പടരാന്‍

ഒരു നിമിഷത്തിന്‍റെ  അകലം.

ഉടുക്കാന്‍ ജനങ്ങള്‍ക്ക്

വസ്ത്രങ്ങള്‍ ഇല്ലാത്തതുകൊണ്ടുമാത്രം

നഗ്നത നിയമപരമായിരിക്കുന്ന രാജ്യത്ത്

ഒരു പക്ഷേ , ഞാനും നഗ്നനായിരിക്കാം.

എങ്കിലും, ഞാന്‍ വിളിച്ചുപറയും

"രാജാവ് നഗ്നനല്ലേ....  "

തുരുമ്പ്

തുരുമ്പിച്ച് തുടങ്ങിയിരുന്ന

കാരിരുമ്പാണി

ഞാന്‍ .

കവിതയൊരു കാന്തമായെന്നെ

നിന്നിലേക്ക്‌ വലിച്ചടുപ്പിക്കുന്നു.